Әлмәттә бер җирле ферма терлекчелек калдыкларын Морат елгасына турыдан-туры агызган
Тикшерү күрсәткәнчә, аммоний катнашмалары рөхсәт ителгән нормадан 15 мәртәбә артык булган.
(Казан, 4 май, "Татар-информ"). Әлмәт районындагы җирле фермадан чыккан терлекчелек калдыклары Морат елгасының пычрануына китергән. Бу хакта Татарстан Экология министрлыгы матбугат хезмәте хәбәр итә.
ТР Экология һәм табигый ресурслар министрлыгының Көньяк-Көнчыгыш территориаль идарәсе белгечләре алган анализ үрнәкләре күрсәткәнчә, аммоний катнашмаларының чик дәрәҗәдә рөхсәт ителгән күләме 15 мәртәбә артык. Экологлар билгеләгәнчә: "Предприятиедәге чистарту корылмалары агынтыларны чистарта алмый, аның бер өлеше төзек түгел. Агынтылар, чистартылмыйча, җирлек рельефына чыгарыла, ә аннан тау буенча су объектына агып төшә".
Хәзерге вакытта ачыкланган хокук бозу очрагы буенча предприятиегә карата административ тикшерү эше алып барыла.