Әлмәттә аккошны коткардылар
Аккошның бугазына балык тота торган кармак җебе белән ыргак эләгеп калган икән.
(Әлмәт, 15 май, "Татар-информ", "Әлмәт таңнары"). Әлмәт коткаручылары бәлагә тарыган аккошка ярдәмгә килде, дип яза җирле басма.
Узган ялларда әлмәтлеләр шарлавыклы буаларда яшәүче ике пар аккошның берсе бәлагә таруын күреп ала. Баксаң, аккошның бугазына балык тота торган кармак җебе белән ыргак эләгеп калган икән. Социаль челтәрдән бу хакта белеп алган кешеләр борчылып коткаручыларга шалтырата.
Экология департаменты белгечләре хәбәр итүенә караганда, операция уңышлы тәмамланган. Ветеринария белгечләре оператив эш итеп аккошны коткарган. Экология департаменты бәхетсезлек очракларын булдырмау максатыннан әлмәтлеләргә аккошларга ипи ашатмаска һәм буаларда балык тотмаска киңәш итә.