Әлмәт театры Әрмәнстан театр фестивалендә катнаша
Әлмәт театрының “Кибет” спектакле – “Алтын битлек” милли театр премиясе номинанты.
(Казан, 1 октябрь, «Татар-информ», Рузилә Мөхәммәтова). Иртәгә Әлмәт Татар дәүләт театры “Кибет” спектакле белән Әрмәнстанга китә. Спектакль 4 октябрь көнне Ереван шәһәрендә Highfest фестивале кысаларында күрсәтеләчәк. Бу хакта театрның матбугат үзәге хәбәр итә.
“Highfest фестивале Ереван шәһәрендә 2 – 5 октябрь көннәрендә үтә. Фестивальнең югары статусын аның дәрәҗәле халыкара профессиональ берләшмәләрдә әгъза булып торуы раслый. Болар – Халыкара Балалар һәм үсмерләр театры ассоциациясе (ASSITEJ) һәм Башкару сәнгате халыкара челтәре (IETM).
Фестивальдә Әрмәнстан, Бөекбритания, Венгрия, Германия, Мисыр, Испания, Израиль, Иран, Кыргызстан, Казахстан, Чехия, Япония театрлары катнаша. Россияне ике театр тәкъдим итә: Пушкин исемендәге Орск драма театры һәм Әлмәт татар дәүләт театры.
Казах драматургы Олжас Жанайдаров пьесасы буенча куелган “Кибет” спектаклендә нибары ике артист – Мәдинә Гайнуллина белән Диләрә Ибәтуллина уйный. “Кибет”нең декорациясе арткы дивардан һәм агач тартмалардан гына тора. Кече формалы спектакльне фестивальләргә һәм гастрольләргә йөртүе уңайлы. Театр сәхнәдә кулланылган тартмаларны үзе белән йөртми, Ереванда гына алачаклар.
- “Кибет” спектакле – “Алтын битлек” милли театр премиясе номинанты.