Әлки районының өч спортчысы билбау көрәше буенча Татарстан беренчелегендә призлы урын алды
Алар өчесе дә билбау көрәше буенча Россия чемпионатында Татарстан командасы составында чыгыш ясаячак.
(Әлки, 9 март, "Татар-информ", "Әлки хәбәрләре"). 1-3 мартта Нурлат шәһәрендә билбау көрәше буенча Татарстан беренчелегендә Базарлы Матактан Регина Нуретдинова беренче урын яулады һәм алтын медальгә ия булды. Бу турыда җирле басма хәбәр итә.
1999-2001 елларда туган яшьләр арасында үткән әлеге турнирда район командасы уңышлы чыгыш ясады. Регинадан тыш, Руслан Нуретдинов (100 килограммнан артык авырлыктагылар арасында) – беренче урын, Рәсим Әхмәров (75 кг) – өченче урын алдылар.
Алар өчесе дә билбау көрәше буенча Россия чемпионатында Татарстан командасы составында чыгыш ясаячак. Бу яшьләр тренерлар Рәмис Вафин һәм Илдар Әхмәров җитәкчелегендә шөгыльләнәләр.