Җәмгыять 28 декабрь 2016 03:00

Әлки районы вәкилләре Оренбургтагы хәрби частьта булып кайтты

Анда хезмәт итүче район егетләре өчен әти-әниләренең кунакка килүе зур бәйрәм булды.

Скопировать ссылку

(Әлки, 28 декабрь, “Татар-информ”, “Әлки хәбәрләре”). Оренбургта хезмәт итүче якташларыбызның әти-әниләре уллары янында кунакта булып кайтты. Татарстанның Әлки районы шефлык иткән хәрби частьта хәзерге вакытта 16 егетебез хезмәт итә, дип яза “Әлки хәбәрләре” газетасы.

Аерым алганда, көздән хезмәткә чакырылган яшь солдатлар ант иттеләр. Әти-әниләренең кунакка килүләре алар өчен, әлбәттә, зур бәйрәм булды. Часть командирлары кунакларга ашханәне, солдатлар яшәгән казармаларны күрсәттеләр, җыелыш үткәрделәр, Әлки егетләренең ничек хезмәт итүләре турында сөйләделәр.

Әлкилеләр дә кунакка буш кул белән бармаган, билгеле. Карга җирлеге башлыгы Рамил Минһаҗев егетләргә микродулкынлы мич бүләк итте. Ә әти-әниләр солдатларның барысына да җитәрлек татлы бавырсак алып барганнар иде, бу күчтәнәчтән улларының хезмәттәшләрен дә авыз иттерделәр.

Шундый еракка барып кайту өчен район яшьләр һәм балалар спорт мәктәбе автобус биреп торды, аңа ягулык салуда Базарлы Матак авыл җирлеге башкарма комитеты булышты, диелә Әлки газетасында.

#Әлки #Әлки хәбәрләре

Сәхифәләр

Әлки районы вәкилләре Оренбургтагы хәрби частьта булып кайтты