Әлки районы башлыгы элеваторда эш барышын тикшергән
Базарлы Матак элеваторы саклауга 85 мең тонна бөртек кабул итә ала.
(Әлки, 28 июль, "Татар-информ", "Әлки хәбәрләре", Азат Низамиев). Әлки район башлыгы Александр Никошин Базарлы Матак элеваторында булып, анда яңа уңыш икмәген кабул итүнең барышы белән кызыксынды. Бу турыда җирле басма хәбәр итә.
Базарлы Матак элеваторы саклауга 85 мең тонна бөртек кабул итә ала. Бирегә яңа ашлык 22 июльдә керә башлаган. Беренче олаулардагы бөртек 22-24 процент дымлылыкта булган. Икмәк турыдан-туры киптерү агрегатларына озатыла.
Хәзер бодай 16-18 процент дымлылык белән керә. Элеватор җитәкчесе Рәис Хәмитов район башлыгына үзләренең яңа уңышны кабул итүгә тулысынча әзер булуын әйтә. Дөрес, хезмәтне тәүлек әйләнәсе тулы куәткә оештыру өчен эшче куллар әлегә җитеп бетми икән. Бирегә бит бөртекне дүрт районнан китерәләр .