Җәлил исемендәге көрәш турнирында Ильяс Галимов истәлегенә махсус бүләк булдырылган

Оештыручылар хәбәр итүенчә, быел Муса Җәлил истәлегенә үткәрелгән көрәш бәйгесе 58нче тапкыр үткәрелә.

Скопировать ссылку

(Казан, 10 февраль, «Татар-информ», Алинә Айдарова). Каһарман-шагыйрь Муса Җәлилгә багышланган «Ватаным Татарстан» газетасы гамәлгә куйган милли көрәш турниры кысаларында узган елны вафат булган данлыклы көрәшче Ильяс Галиев истәлегенә махсус бүләк булдырылган.

«Быел Татарстанның Көрәш федерациясе ярдәмендә приз фонды артты: 50 мең, 30 мең һәм ике өченче урынга — егермешәр мең. Федерация җитәкчесе Марат Әхмәтов белән киңәшләштек тә, узган елны мәрхүм булган Ильяс Галимов истәлегенә махсус бүләк бирергә булдык. Ул финалда иң яхшы көрәшкән бер егеткә биреләчәк. Премия күләме кечкенә түгел. Бәясен әлегә әйтмим», — диде «Ватаным Татарстан» газетасы баш мөхәррире урынбасары Илнар Хөснуллин.

Оештыручылар хәбәр итүенчә, быел Муса Җәлил истәлегенә үткәрелгән көрәш бәйгесе 58нче тапкыр үткәрелә. Быел әлеге турнир 12-13 февральдә Минзәләдә үтәчәк. «Турнирның турыдан-туры трансляциясен „Instagram"да «Батырлар» аккаунты аша карап булачак», — диде „Ватаным Татарстан“ газетасы баш мөхәррире урынбасары.

Минзәлә муниципаль районының Башкарма комитеты җитәкчесе Камил Нәҗмиев сүзләренчә, турнир ачылышында Вил Усманов, Резидә Шәрәфиева, Минзәлә татар дәүләт драма театры коллективы һәм Минзәлә шәһәре үзешчәннәре чыгыш ясаячак.

Сәхифәләр

Җәлил исемендәге көрәш турнирында Ильяс Галимов истәлегенә махсус бүләк булдырылган