Мәдәният 20 июнь 2017 12:34

Әлфия Авзалованың соңгы җырлаган җыры билгеле (видео)

Әлфия Авзалова, Казанның 7нче хастаханәсендә ятканда, кызы Зөлфия белән бергәләп җырлаган.

Скопировать ссылку

(Казан, 20 июнь, «Татар-информ», Рузилә Мөхәммәтова). Татар халкының легендар җырчысы Әлфия Авзалованың соңгы җырлаган җыры – “Сагыну җыры”. Рим Хәсәнов белән Гыйльман Идрисов авторлыгында язылган бу җырны “Ак чәчәкләр кебек кар ява” дигән исем белән дә атап йөртәләр.

Әлфия Авзалова бу җырны Казанның 7нче хастаханәсендә ятканда, кызы Зөлфия белән бергәләп җырлаган. “Әни хәтта җырлый башлаган иде инде... “Ак чәчәкләр кебек кар ява, Хәтерләтеп ямьле май кичен...” – дип мин җырлыйм, “ла-ла-ла” – дип кушыла”, - дип сөйләде “Татар-информ” хәбәрчесенә кызы Зөлфия.

Әлфия Авзалованың ике кызы – Зөлфия белән Гүзәл әниләрен кырык көн буе бер дә ялгызын калдырмыйча саклыйлар. Гүзәл төннәрен аның палатасында кунса, Зөлфия көне буе әнисе янында тора. Әлфия Авзалова 15 июньгә каршы төндә вафат була, 17 июнь көнне Яңа татар бистәсе зиратына җирләнә. Бөек җырчыны озатырга Г.Тукай исемендәге Татар дәүләт филармония залына 2000 кеше килә.

Сагыну җыры

Гыйльман Идрисов шигыре, Рим Хәсәнов көе

Ак чәчәкләр кебек кар ява,
Хәтерләтеп ямьле май кичен,
Шомырт чәчәк аткан тугайда
Йөргән идек икәү нур кичеп.

Тормыш юлларыбыз шул кичтә
Аерылды төрле якларга;
Ә шулай да иркәм гел истә,
Алыштырмам аны ятларга.

Араларда озын юллар бар,
Барыр идем дә бит арымый,
Күрешергә ничә еллар бар,
Ничек түзәрмен соң сагынмый.

#Әлфия Авзалова

Сәхифәләр

Әлфия Авзалованың соңгы җырлаган җыры билгеле (видео)