Әлфия Авзалованың кызы Илһам Шакиров белән ун көн элек күрешкәнен әйтте
“Ике йолдыз гомерләре буе янәшә бардылар да, ел ярым ара белән бер-бер артлы киттеләр”, - диде ул.
(Казан, 16 гыйнвар, “Татар-информ”, Рузилә Мөхәммәтова). Әлфия Авзалованың кызы Зөлфия Авзалова мәрхүм Илһам Шакиров белән соңгы тапкыр моннан ун көн чамасы элек күрешкән. Бу турыда ул “Татар-информ” хәбәрчесенә сөйләде.
- Бөек татар җырчысы Илһам Шакиров бүген 84 яшендә вафат булды.
“Илһам абый белән соңгы тапкыр 5 гыйнварда күрештек. Мин аның янына еш барып йөрдем, монысы соңгысы булган икән. Ул утырып тора иде, тик кешенең чирләве күренә иде инде. Соңгы күрешү икән күңелем сизде кебек, бик авыр тойгылар белән киттем”, - диде ул.
Зөлфия кичә Әлфия Авзалованың туган көне булуын әйтте. “Ике йолдыз гомерләре буе янәшә бардылар да, ел ярым ара белән бер-бер артлы киттеләр”, - диде ул.
Зөлфия Авзалова җырчы Илһам Шакировка ярдәм итеп яшәгән Илһам Хаҗиевка рәхмәтләрен җиткерде.