Әлфия апа футболны ник ярата? – "Ватаным Татарстан" газетасы
"Иртәдән бирле дүрт мең сумлык чәкчәк саттым. Әле көннең беренче яртысы гына. Быел бу кадәр саткан юк иде әле", – ди Әлфия апа.
Скопировать ссылку
(Казан, 22 июнь, "Татар-информ", "Ватаным Татарстан", Эльвира Вәлиева). Казанны Конфедерацияләр Кубогына бизәү өчен илле миллион сум акча тотканнар. Юлларга исә өч миллиард сумга якын акча “түшәлгән”. Кунакка килгән җанатарлар да акчасын кызганмый. Алар Казанда көненә уртача 10-12 мең сум туздыра. Соңгысына барыннан да бигрәк Бауман урамында милли ризыклар сатучы Әлфия апа сөенә, дип яза "Ватаным Татарстан" газетасы.
Кичә Казанда көне буе яңгыр явуга да карамастан, төш вакытында Бауман урамында халык шактый иде. Башкалада дөньякүләм чара баруы әллә кайдан аңлашыла: җәяүлеләр урамында төркем-төркем чит ил җанатарлары йөри. Яңгырдан да куркып тормыйлар! Сувенир сатучы кибетләрнең берсенә кергән Германия кунаклары түшенә “Kazan” дип язылган футболка сайлый. Шөкер, сатучы әзме-күпме алманча белә икән. “Мин – татар” дип язылган футболканы да сатып җибәрде. Германиядән кадәр килсәләр дә, туристлар Казан мәчесенең тарихын белә булып чыкты. Бер-берсен бүлдерә-бүлдерә сөйләп бирделәр. Татарстан башкаласына беренче тапкыр гына килүләре икән. Ил җыелма командасы өчен җан атарга дип әләм дә әзерләп куйганнар. Туристларга урамда тәм-том сатучылар да сөенә. “Иртәдән бирле дүрт мең сумлык чәкчәк саттым. Әле көннең беренче яртысы гына. Быел бу кадәр саткан юк иде әле”, – ди Әлфия апа. Сүз уңаеннан, Бауман урамында чәкчәк бәясе кибетнеке белән чагыштырганда икеләтә кыйммәтрәк. Әмма кунакларны ул гына туктата алмый. Барысының да кулында чәкчәк.
“Узган елның шушы ук чоры белән чагыштырганда, башкалада туристлар саны 10-15 процентка күбрәк, – диде Хөкүмәт йортында узган брифингта Татарстан Туризм буенча дәүләт комитеты җитәкчесе Сергей Иванов. – Гадәттә, Казан кунаклары көненә уртача 6-8 мең сум акча тотса, җанатарлар күбрәк акча туздыра. Бу аларның үз-үзен тотышына да бәйле. Төн җиткәч икенче сулышлары ачыла бит аларның. Футбол яратучылар кунакханәгә кайтып йокларга ашыкмый. Әнә Португалия белән Мексика уйнаган көнне Мексика җанатарлары үзләре җиңү яулаган кебек бәйрәм итте”.
Кунакханәләр дигәннән, Конфедерацияләр Кубогы алдыннан кунак кабул итүчеләр дә сынау узган. Татарстан кунакханәләренең “йолдыз”ларын тикшергәннәр. Бүген Казанда “биш йолдызлы” – өч, “дүрт”ле – 19 һәм “өч”ле 34 кунакханә бар. “Спортчылар яшәячәк бүлмәләрне йөреп тикшереп чыктык”, – диде башкала җитәкчесе урынбасары Евгения Лодвигова. Бу эштә мэр Илсур Метшин да катнашкан. Дөньякүләм танылган футболчы Криштиану Роналду яшәячәк бүлмә каршындагы йорт диварына спортчы рәсемен төшерү фикерен дә нәкъ менә Илсур Метшин тәкъдим иткән. “Бу уйламаганда гына килеп чыкты. Аны Чаллыда яшәүче рәссам ясады. Ул кадәр зур шау-шу куптарачак дип башка да килмәде. Хәзер киләсе елда узачак футбол буенча дөнья чемпионатына да яңа рәсемнәр ясау теләге бар”, – диде Казанның баш архитекторы Татьяна Прокофьева. Зур проектлар көтелми, дип тә искәртте ул.
Хәер, башкалада төзекләндерү, тирә-юньне тәртипкә китерү эшенең туктаганы да юк. Кунак каршы алырга өйрәнеп беттек бит инде.
Конфедерацияләр Кубогы алдыннан шәһәрне чәчәкләргә күмү өчен генә дә 50 миллион сум акча тотканнар. Башкала халкы ялтырап торган юлларга да сөенә. Анысына өч миллиард сум киткән. “Туристларны шаккатырып кына калмыйча, башкарган эш шәһәрдә яшәүчеләргә дә файда китерсен иде”, – ди баш архитектор.
Гаҗәпкә калдырырга теләүчеләр дә юк түгел. Казандагы грузин ашлары тәкъдим итүче кафеларның берсе Конфедерацияләр Кубогына махсус ризык уйлап тапкан. “Матчапури”ны фәкать уен көннәрендә генә ашап карарга мөмкин, ди. “Спортчылар һәм җанатарлар өчен нинди яңалык тәкъдим итик дип бик озак уйладык. Нәтиҗәдә грузиннарның яраткан ашын бераз үзгәртеп, камыр ризыгының уртасына гадәттәгечә бер тавык йомыркасы түгел, ә командадагы уенчылар саны кадәр, ягъни унбер бытбылдык йомыркасы сытып пешерә башладык. “Матч” футболга бәйле сүз булса, “пури” грузинчадан “ипи” дип тәрҗемә ителә”, – диде кафе директоры. “Матчапури”ны Татарстан Президенты Рөстәм Миңнеханов та ошаткан хәтта. Ул киләсе елда узачак Дөнья Чемпионатына да яңа ризыклар уйлап табарга киңәш иткән.
Кичәге бер көнлек тәнәфестән соң Конфедерацияләр Кубогы уеннары кабат башлана. Бүген кич зур матч көтелә. Мәскәүдә Россия җыелма командасы Португалия футболчыларына каршы уйный. Хәтерләсәгез, беренче уенда безнекеләр Яңа Зеландияне отып, үз төркемендә беренче урынга чыккан иде. Соңгы очрашуны исә Россия җыелма командасы Татарстан башкаласында шимбә көнне Мексикага каршы уздыра. Аңа кадәр исә “Казан Арена”да тагын бер уен булачак. Иртәгә кич Алмания белән Чили футболчылары очраша. Бу матчны Конфедерацияләр Кубогының төркем уеннары арасында иң кәттәсе дип тә атыйлар.