«Идел» журналының рус басмасы Тик-ток һәм сторис форматында чыга башлаячак
Журнал коллективына яңа җитәкчене — журналист һәм блогер Айсылу Хафизованы тәкъдим иттеләр.
(Казан, 30 декабрь, «Татар-информ»). Рус телендә чыга торган «Идел» журналында җитәкче алмашынды. Басманы кабаттан журналист, сценарист, блогер Айсылу Хафизова җитәкләячәк.
Кичә яңа җитәкчене журнал коллективына тәкъдим иттеләр. Айсылу Хафизова әйтүенчә, 2021 елда «Идел» форматын үзгәртәчәк һәм контентны үз аудиториясе ихтыяҗларына юнәлтәчәк.
«Татмедиа» акционерлык җәмгыяте җитәкчелеге форматны актуальләштерү, максатчан аудиториянең чын ихтыяҗларын исәпкә бурычын куйды. Ә журналны 17 яшьтән өлкәнрәкләр укый, — ди ул. — Хәзерге яшьләр лонгридлар укымый, моның белән килешергә кирәк. Яшьләр мультимедиа форматы: кыска видео, мемнар, клиплар куллана. Фикерләүне Инстаграмдагы сторис һәм Тик-токтагы музыкаль видеолар форматына үзгәртергә кирәк».
Үрнәк итеп ул «Татарстан яшьләре» газетасын атады, үзгәртеп кору чорында аның базасында «Яшь журналист мәктәбе» эшләгән. Хәзер бу традицияне кире торгызу планлаштырыла: мәктәп укучыларын журналист һөнәре нигезләренә өйрәтү, аларга үз проектларын һәм идеяләрен тормышка ашырырга мөмкинлек бирү.
«Планнарда сторислар — сериаллар, YouTube өчен контент төшерү һәм башкалар бар. Яңа елда шуның белән шөгыльләнәчәкбез», — ди Айсылу Хафизова.
«Идел» журналының элекке баш мөхәррире — журналист һәм шагыйрә, җәмәгать эшлеклесе Альбина Әбсәләмова хәзерге вакытта «Казан» журналын җитәкли.