Яшел Үзән китапханәсендә укучылар өчен квест үткәрделәр

(Яшел Үзән, 28 ноябрь, «Татар-информ», «Яшел Үзән»). Яшел Үзән үзәк китапханәләр системасы хезмәткәрләре 4 нче мәктәп һәм 14 нче лицей укучылары өчен квест үткәрде. Бу хакта район газетасы яза.

Уенның асылы — укучыларны, беренче карашка гына бик гади булып күренгән, китапханәче эше белән таныштыру.

Балалар абонементта һәм уку залында эшләделәр: яңа укучыларга формулярлар тутырдылар, каталогларда китаплар эзләделәр һәм бирелгән тема буенча китаплар сайладылар, диелә хәбәрдә.

Шулай ук, ике команда да яраткан китапларын тәкъдим итү чыгышы ясады.