Казахстанның татар һәм башкорт конгрессы җитәкчесе Лондондагы бәйге финалына чыкты
Тәүфыйк Кәримов конкурска инглиз һәм рус телләрендә Лондон әдәби премиясе химаясендә нәшер ителгән «Fata Morgana» китабын тәкъдим иткән.
(Казан, 8 ноябрь, «Татар-информ»). Казахстанның Нур-Солтан шәһәрендә яшәүче язучы һәм җәмәгать эшлеклесе, Казахстан татар һәм башкорт конгрессы җитәкчесе Тәүфыйк Кәримов Чарльз Диккенс исемендәге премия финалына чыкты. Бу турыда Бөтендөнья татар конгрессы матбугат хезмәте хәбәр итә.
Тәүфыйк Кәримов конкурска инглиз һәм рус телләрендә Лондон әдәби премиясе химаясендә нәшер ителгән «Fata Morgana» китабын тәкъдим иткән.
Дөньяның кырыктан артык иленең язучыларын берләштерә торган Интернациональ язучылар берлеге Лондон Халыкара әдәби премиясенең «Звезда» категориясендә финалистлар исемлеге билгеле. Бу исемлеккә әдәбият өлкәсендә тәҗрибәле авторлар кергән. Алты номинациядә финалга чыгучылар арасында Россия, АКШ, Бөекбритания, Канада, Нидерланд, Франция, Литва, Украина, Израиль, Көньяк Корея, Азәрбәйҗан, Казахстан язучылары бар.
Тәүфыйк Кәримов Казахстан, Россия, Татарстан, Азәрбайҗан, Интернациональ язучылар берлеге әгъзасы, рус, казах, татар һәм инглиз телләрендә басылган китаплар авторы, Саҗидә Сөләйманова исемендәге әдәби премия лауреаты (Казан), Интернациональ язучылар берлеге версиясе буенча (Мәскәү) «Иң яхшы язучы 2015-2019» исеменә ия.