Лениногорск районында буран вакытында бер гаилә утырган машина трассада карга батып калган
Тукмак авылы тирәсендә кичен көчле буранга очраган гаиләгә коткаручылар ярдәм иткән.
(Казан, 31 март, «Татар-информ»). Лениногорск районында коткаручылар машиналары карда баткан балалы гаиләгә ярдәм иткән. Бу хакта Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр.
«Кичә кич Тукмак авылы тирәсендә «Нива» машинасы карда батып калган. Автомобильдә 45 яшьлек ир-ат, 47 яшьлек хатын-кыз һәм 15 яшьлек кыз бала булган», - дип сөйләделәр Гадәттән тыш хәлләр министрлыгы матбугат хезмәтендә.
7 нче номерлы зона коткаручылары машинаны кардан чыгарып, юлның чистартылган өлешенә кадәр озаткан. Машина йөртүчегә көчле буран вакытында трассада куркынычсызлык чаралары турында аңлатканнар.
