Татар дөньясы 15 февраль 2023 17:24

Ленинград өлкәсенең Дуслык йортында Муса Җәлилгә багышланган кичә узды

Скопировать ссылку

12 февральдә Ленинград өлкәсенең Дуслык йорты бинасында герой-шагыйрь Муса Җәлилгә багышланган чара узды.

Сәламләү сүзе белән Татарстан Республикасының Санкт-Петербург һәм Ленинград өлкәсендәге Даими вәкиле Ренат Вәлиуллин һәм «Файда» татар мәдәни җәмгыяте җитәкчесе Айрат Маннанов чыгыш ясады. «Питер.татар» сайты шул турыда яза.

Алып баручы Айгөл Селезнева Муса Җәлилнең сугышка кадәрге һәм сугыш чорындагы тормышы һәм иҗаты белән таныштырды.

Диләрә Шәкүрова материалны үз чыганаклары белән тулыландырды, фотосурәтләр, китаплар һәм башка материаллар күрсәтте.

Шагыйрьнең әсәрләрен Санкт-Петербургның төрле мәктәпләрендә укучы Селезнев Роман, Мороз София һәм Кучеряева Диана укыды.

Мансур Аббазов, Эльнара Хөсәенова, Янифа Федосова, Линара Куликова (Николашкина) шигырьләр сөйләде, Ленинград өлкәсе Язучылар берлеге әгъзасы Алексей Носов Муса Җәлил турында баллада башкарды.

Шагыйрь турындагы фикерләре белән Роза Чеснакова уртаклашты. Ахырда шагырьне бер минут тынлык белән искә алдылар. Чарада катнашучыларга «Файда» татар мәдәни җәмгыятенең Рәхмәт хатлары һәм бүләкләре тапшырылды.

Сәхифәләр

Ленинград өлкәсенең Дуслык йортында Муса Җәлилгә багышланган кичә узды