Ленар Гарипов: Татарстанда көчле хуҗалыкларга зур игътибар бирелә

Татарстан Авыл хуҗалыгы һәм азык-төлек министрының беренче урынбасары Ленар Гарипов республикада көчле хуҗалыкларга игътибар бирелүен әйтте. Бу хакта ул Бөтендөнья татар конгрессының XIII Бөтенроссия татар авыллары эшмәкәрләре җыены ачылышында сөйләде.

«Татарстанда көчле хуҗалыкларга зур игътибар бирелә. Бүгенге көндә 400 меңләп шәхси хуҗалык, 2600 фермер хуҗалыгы исәпләнә. Алар 2024 елда тулаем 142 млрд сумлык авыл хуҗалыгы продукциясе җитештергән. Татарстан мондый нәтиҗәләргә ирешүнең авыл хуҗалыгын цифрлаштыру һәм модернизацияләү комплекслары зур булуга йогынты ясый», - диде ул.

Аның әйтүенчә, узган елның йомгаклары буенча Татарстан агросәнәгать комплексының цифрлы трансформацияләү динамигы буенча беренче урын алган. «Авыл хуҗалыгы цифрлы технологияләр кертү буенча ике ел рәттән башка төбәкләр арасында беренчелекне тотабыз», - диде Татарстан Авыл хуҗалыгы һәм азык-төлек министрының беренче урынбасары.

«Иртәгә Тәтеш, Апас районында эшмәкәрләрнең тәҗрибәсен күрерсез. Бу районнарда алдынгы эшмәкәрләрнең ничек эшләвен, тәҗрибә куюларын карарсыз. Татарстан агросәнәгать комплексының узган елгы нәтиҗәләренә тукталсак, республика тулысынча үзебездә җитештерелгән төп азык-төлек төрләре белән тәэмин ителә. Ит, сөт, йомырка, икмәк, шикәр һәм бәрәңге буенча тәэмин ителеш Татарстанда яшәүчеләргә һәр кешегә исәпләнгәндә нормадан йөз процентка артык», - диде ул.

Ленар Гарипов узган ел һава шартлары җиңел булмавын, шулай да авыл хезмәткәрләренең тырышлыгы нәтиҗәсендә югары күрсәткечләргә ирешеп булганны искәртте.

«Барлыгы 341 млрд сумга авыл хуҗалыгы продукциясе җитештерелде, нәтиҗәдә, Татарстан авыл хуҗалыгы продукциясен җитештерү күләме буенча лидерлы төбәкләрнең беренче өчлегенә керде», - дип билгеләп үтте ул.

• 26-28 февральдә Бөтендөнья татар конгрессы XIII Бөтенроссия татар авыллары эшмәкәрләре җыенын уздыра. Быел әлеге җыенга Россия Федерациясенең 48 төбәгеннән, шулай ук Татарстаннан 900 кече бизнес вәкилләре, фермер хуҗалыклары җитәкчеләре һәм хакимият органнары вәкилләре җыелды. Өч көнлек программада дискуссион мәйданчыкларда эшләү, Татарстан Рәисе катнашында пленар утырыш, Татарстанның Апас һәм Тәтеш районнарына сәфәр һәм мәдәни программа каралган.

  27 февральдә җыенда катнашучылар Татарстан Республикасының Апас һәм Тәтеш муниципаль районына сәфәр кылачак. Биредә алар җирле эшмәкәрләренең хуҗалыклары, агросәнәгать комплексларындагы казанышлар, инновацион технологияләр, инфраструктураны үстерүдә алып барылган эш тәҗрибәсе белән танышачаклар. Әлеге сәфәр эшлекле элемтәләр булдыру өчен дә ярдәм итәчәк.