Ләйлә Фазлыева “Сәләт”леләрне гаиләләр төзергә чакырды
Аның фикеренчә, “Сәләт” яшьләре уникаль һәм талантлы кешеләр.
(Казан, 27 февраль, “Татар-информ”, Зилә Мөбәрәкшина). Татарстан Премьер-министры урынбасары Ләйлә Фазлыева “Сәләт” оешмасы яшьләрен гаилә төзергә һәм балалар табарга чакырды. Бу хакта ул “Сәмрух” премиясе тантанасында сөйләде.
“Мин сезгә туган телебезгә булган мөнәсәбәтегез өчен рәхмәт белдерәм. Бу чыннан да бик мөһим әйбер. Сез – патриот. Сез командада бергәләп аңлаша һәм эшли беләсез. Бу сыйфатлар киләчәктә кирәк булачак. Гаиләләр төзегез, балалар табыгыз, бер-берегезне яратыгыз”, - диде ул.
“Сез – уникаль, талантлы шәхесләр. Сез туган телегезне беләсез. Һәркайсыгыз өчен ул тормышыгызда гаҗәеп мизгел. Бер телдә сөйләшүче һәм икенче телне өйрәнүче кеше буларак әйтәм, ышаныгыз, ул һәрвакыт кыен бирелә. Сез халкыбызның мәдәниятен, телен саклыйсыз”, - диде Ләйлә Фазлыева.