Кытай делегациясенә Казанда «Кол Шәриф» мәчетен һәм Благовещение соборын күрсәттеләр
КХР Дәүләт Советы премьеры урынбасары Чжан Гоцин җитәкчелегендәге Кытай делегациясенә Татарстан башкаласында Казан Кремлендә «Кол Шәриф» мәчетен һәм Благовещение соборын күрсәттеләр. Бу хакта РФ вице-премьеры Марат Хөснуллин Телеграм-каналында сөйләде. Ул Татарстан Рәисе Рөстәм Миңнеханов белән кунакларны озатып йөрде.
«<...> Кытай хезмәттәшләремә минем яраткан урыннарымның берсе – Казан Кремлен күрсәттем. Бу Казанның иң борынгы өлеше. Һәм, әлбәттә, шәһәрнең дә, тулаем республиканың да визит карточкасы», – дип билгеләп үтте вице-премьер.
«Кол-Шәриф» мәчетен һәм Благовещение соборын карадык. Казан – күп халыклар һәм дини конфессияләр вәкилләре бергә тыныч яшәү буенча үрнәк булып тора», - дип ассызыклады Хөснуллин, кунаклар «әлбәттә, күзәтү мәйданчыгында булды, аннан шәһәр бик яхшы күренә», дип өстәде.
Казанга «Идел-Янцзы» форматындагы Төбәкара хезмәттәшлек советының V утырышы чараларында катнашу өчен килгән Чжан Гоцин җитәкчелегендәге Кытай делегациясе элегрәк Бәшир Раммев исемендәге IT-паркта һәм Казан федераль университетында (шул исәптән аның музеенда) булган иде. Соңрак кунаклар хуҗалар белән Җиңү паркындагы Мәңгелек утка чәчәкләр куйды.