Дин 24 март 2020 16:39

Кырым мәчетләрендә җомга намазларын өч атнага туктатканнар

Имамнарга дин тотучылар арасында коронавирусны кисәтү буенча аңлату эшләре алып барырга киңәш ителгән.

Скопировать ссылку

(Казан, 24 март, «Татар-информ»). Коронавирус инфекциясе таралу куркынычы аркасында Кырым мәчетләрендә җомга намазларын укуны һәм күмәк гыйбадәтләрне быелның 12 апреленә кадәр туктатканнар. Бу хакта «Интерфакс» агентлыгы Кырым мөселманнары Диния нәзарәтенә сылтама белән хәбәр итә.

«Әлеге чаралар COVID-19 коронавирусы таралу куркынычы аркасында һәм узган атнада Кырым Республикасында инфекция йоктыруның беренче очрагы ачыклануга бәйле рәвештә кертелгән», — диелә хәбәрдә.

Моннан тыш, Кырым мөфтие боерыгы белән 12 апрельгә кадәр традицион дини йолалар (дога, исем кушу һәм никах) үткәрү дә туктатылган. «Мәет җирләү йоласын һәм җеназа намазын барлык куркынычсызлык кагыйдәләрен саклап, физик контактка кермичә үткәрергә киңәш ителә», — диелә мөфтият хәбәрендә.

Шулай ук Хаҗи Ихсан исемендәге Азов югары ислам фәннәре мәдрәсәсенең дә өч атнага ябылуы хакында искәртелә.

Ихтыяҗ туган очракта, мөфти боерыгының гамәлдә булу вакыты озайтылачак. Имамнарга дин тотучылар арасында коронавирусны кисәтү буенча аңлату эшләре алып барырга киңәш ителгән.

Кырымда 1,9 миллион кеше яши, шуларның 300 меңнән артыгы — мөселманнар.

#Кырым #намаз #коронавирус

Сәхифәләр

Кырым мәчетләрендә җомга намазларын өч атнага туктатканнар