Кырлайда Тукай яшәгән Сәгъди йортын реставрацияләү башланды
Татарстан Арча районы Яңа Кырлай авылында «1892-1895 елларда шагыйрь Габдулла Тукай яшәгән крестьян Сәгъди утары» дигән агачтан төзелгән сәнгать һәйкәлен реставрацияләү оештырылган. Бу хакта Татарстан Мәдәни мирас объектларын саклау комитеты матбугат хезмәте хәбәр итә.
Йорт XIX гасыр азагында татар крестьяннарының традицион стилендә бүрәнәдән төзелгән бер катлы бина. Бинаның тәрәзәләре бизәкле уеп ясалган йөзлекләр белән бизәлгән. Утар торак биналарны, хуҗалык корылмаларын һәм эчке ишегалдын үз эченә ала.
Мәдәни мирас объектында эшләр татар әдәбияты классигының 140 еллыгы уңаеннан оештырылды. Габдулла Тукай балачагында крестьян Сәгъди Салихов йортында өч елга якын вакыт үткәрә, бу аның шәхесе формалашуына һәм иҗат юлына сизелерлек йогынты ясый. Бу йорт шагыйрьнең тамырлары һәм халкы белән бәйләнеш символына әверелде, бу аны татар мәдәнияте өчен аеруча әһәмиятле итә, дип билгеләп үттеләр ведомствода.
Түбә ремонтланган, таш юллар салынган, электр һәм җылылык белән тәэмин ителгән, бура реставрацияләнгән, тәрәзәләр алмаштырылган, фасадлар буялган, идәннәрне тәртипкә китерү эшләре башкарылган.
Киләчәктә янәшәдәге территорияне төзекләндерү һәм тышкы яктыртуны урнаштыру эшләре башкарылачак. Эшләрне 2025 елда тәмамлау планлаштырыла, ә 2026 елның апрелендә бәйрәм чаралары узачак.
Татарстан Мәдәни мирас объектларын саклау комитеты рәисе Иван Гущин мәгълүматлары буенча, Татарстанда барлыгы 100дән артык мәдәни мирас объекты — агачтан төзелгән сәнгать һәйкәлләре бар. Әлеге объектларны саклауга һәм торгызуга юнәлдерелгән махсус дәүләт программасы кысаларында комитет контролендә 2023 елда ике агач архитектура һәйкәле реставрацияләнде.
Программа шулай ук традицион агач һөнәрчелеген торгызуга ярдәм итә, бу республиканың рухи һәм мәдәни үсешендә мөһим роль уйный, дип өстәде Гущин.
«Татар-информ» хәбәр иткәнчә, Татарстанда Тукайның әдәби-мемориаль музеен һәм крестьян Сәгъди утарын 135 млн сумга төзекләндерәчәкләр. Элек эшләр 1 декабрьгә тәмамланыр дип планлаштырылган иде.