Татар дөньясы 30 май 2026 15:17

Кыргызстанда Муса Җәлил истәлегенә флешмоб узды

Скопировать ссылку

2026 елның 26 маенда Кыргызстанда татар шагыйре Муса Җәлил истәлегенә флешмоб узды, дип хәбәр итә Бөтендөнья татар конгрессы матбугат хезмәте.

Чараның төп максаты укучыларны Бөек патриот шагыйрьнең биографиясе белән таныштыру гына түгел, ә үсеп килүче буында горурлык, батырлык һәм интернационализм хисләре тәрбияләү булды. Муса Җәлил — сыгылмас ихтыяр символы, аның фашистларның Моабит концлагеренда язылган шигырьләре кешелек дәрәҗәсенә гимн кебек яңгырый, диелә хәбәрдә.

2 нче сыйныф укучылары, буыннар дәвамчанлыгын күрсәтеп, шагыйрьнең балалар шигырьләреннән эчкерсез һәм тәэсирле юллар сөйләделәр. Бишенче һәм алтынчы сыйныф укучылары әдәби-музыкаль композиция әзерләгәннәр.

Флешмобның кульминациясе «Моабит дәфтәре»ннән танылган әсәрләрне коллектив башкару булды. Рус һәм татар телләрендәге юлларның яңгырашы төрле халыкларның мәдәни мирасына тирән интернациональ бәйләнешне һәм ихтирамны ассызыклады.

Чара киләчәк буыннар азатлыгы өчен гомерләрен биргән барлык геройлар истәлегенә бер минутлык тынлык белән тәмамланды. Мәктәп чираттагы тапкыр Бөек Ватан сугышы геройлары турындагы истәлекнең исән булуын һәм буыннан-буынга тапшырылуын исбатлады.

Сәхифәләр

Кыргызстанда Муса Җәлил истәлегенә флешмоб узды