Дин 26 август 2020 15:05

Кыргызстан мәчетләрендә биш ай чикләүдән соң, җомга намазлары рөхсәт ителде

Дин тотучылар санитар-гигиена кагыйдәләрен һәм социаль дистанцияне төгәл үтәргә тиеш.

Скопировать ссылку

(Казан, 26 август, «Татар-информ»). Кыргызстан мөселманнары Диния нәзарәте коронавирус таралу сәбәпле март аеннан башлап ябылган мәчетләрдә җомга намазларын укырга рөхсәт иткән. Бу хакта мөфтиятнең матбугат секретаре Максат Атабаевка сылтама белән «Интерфакс» хәбәр итте.

«Ил мәчетләрендә җомга намазлары якындагы җомга көнне яңартыла. Дин тотучылар санитар-гигиена кагыйдәләрен һәм социаль дистанцияне төгәл үтәргә тиеш. Мәчетләрдә озак вакыт булырга киңәш ителми, кул биреп һәм кочаклашып күрешү тыела», — диде идарә вәкиле.

Аның сүзләренчә, югары куркыныч төркеменә кергән гражданнар зарарланмасын өчен, балаларга, өлкән яшьтәге кешеләргә һәм инвалидларга мәчеткә барырга киңәш ителми. Җәмәгать намазларын ачык һавада үткәрергә тәкъдим ителә.

Пандемия башланганнан бирле Кыргызстанда COVID-19 инфекциясе белән зарарлануның расланган 43 358 очрагы теркәлгән. 37 217 кеше дәваланган, 1058 кеше үлгән.

#Коронавирус буенча карантин #коронавирус #Кыргызстан

Сәхифәләр

Кыргызстан мәчетләрендә биш ай чикләүдән соң, җомга намазлары рөхсәт ителде