Кузбасстагы Шахтёрлар Сабан туена 27 меңнән артык кеше җыелган
Узган ял көннәрендә Прокопьевскида гөрләгән Шахтёрлар Сабан туена 27 меңнән артык кеше килгән. Кузбасс губернаторы Илья Середюк шундый мәгълүмат китерде, дип хәбәр итә Бөтендөнья татар конгрессы матбугат хезмәте.
«Төрле мәдәният традицияләренең Кузбасста янәшә яшәвен, бер-берсен баетып, җәмгыятебезнең нигезен тагын да ныгытуын нәкъ менә шундый вакыйгалар аша күрсәтәбез», — диде губернатор.
Кузбасста Шахтёрлар Сабан туе инде алтынчы ел рәттән уза. Алты ел дәвамында бәйрәмгә Татарстан Республикасыннан рәсми делегация килә, быел кунаклар арасында шулай ук Томск өлкәсе, Луганск һәм Донецк Халык Республикалары делегацияләре дә бар иде.
Бәйрәм мөһим тантанадан башланды — Дан Монументына чәчәкләр салдылар. Аннары «Алга» дип аталган милләтара җиңел атлетика йөгерешенә старт бирелде. Анда 120дән артык спортчы катнашты. Ярминкәдә 140тан артык оста үзләренең уникаль эшләнмәләрен тәкъдим итте, ә 12 тематик утар халык иҗаты атмосферасына чумарга мөмкинлек бирде.
Кунаклар алдында Кузбасс һәм Татарстаннан 30 иҗат коллективы чыгыш ясады. Теләгән һәркем берничә мәйданчыкны (спорт мәйданчыгы, ярминкә, кием фестивале, милли яулык фестивале һәм түбәтәйләр конкурсы) күзәтә алды.
Көрәш ярышлары Сабан туеның иң югары ноктасы булды. Новокузнецкидан Василий Шолохов 2026 елгы Шахтёрлар Сабан туеның абсолют батыры булып танылды.