Кукмараның "Чулпан" балалар бакчасында сабыйлар ярышты
Балалар "Кыю хоккейчылар", "Төз атучы", "Себеркедә узышу" һәм башка төрле эстафеталарда елгырлыкларын һәм җитезлекләрен күрсәттеләр.
(Кукмара, 1 февраль, "Татар-информ", "Хезмәт даны", Алсу Гатауллина). Кукмараның "Чулпан" балалар бакчасында "Кышкы уеннар" дигән спорт ярышлары үтте. Бу турыда kukmor-rt.ru сайты хәбәр итә.
Бәйрәм программасы шактый бай иде. Ике команда: "Кар бөртекләре" һәм "Кар бабайлар" җиңү өчен көрәште. Әкият геройлары – Кар бабай һәм Убырлы карчык та катнашты. Яшь катнашучылар өчен җан атарга әти- әниләре дә килгән иде. Балалар "Кыю хоккейчылар", "Төз атучы", "Себеркедә узышу" һәм башка төрле эстафеталарда елгырлыкларын һәм җитезлекләрен күрсәттеләр.
"Бала шат күңелле һәм сәламәт икән, барысын да булдыра. Ә сәламәт булу өчен бу хакта кечкенәдән үк кайгыртырга кирәк. Шуңа күрә безнең бакчада балаларның сәламәт яшәү рәвешенә зур игътибар бирелә. Биредә һәр иртә зарядкадан башланып китә, ә ул күңелне күтәреп җибәрә. Балаларның күбесе спорт секцияләрендә шөгыльләнә", - дип сөйли физик культура буенча инструктор Светлана Матниязова.