Кукмарада яшәүче гаилә Сочида ГТО буенча республика данын яклаячак
Алар Бөтенроссия физкультура-спорт комплексы фестиваленең гаилә командалары арасындагы II этабында җиңүгә ирештеләр.
(Кукмара, 16 апрель, "Татар-информ", "Хезмәт даны"). Апрель азагында Кукмара гаиләсе командасы, республика данын яклап, Сочида россиякүләм бәйгедә катнашачак. Бу турыда "Хезмәткә һәм оборонага әзер" үзәге җитәкчесе Руслан Габдрахманов хәбәр итте, дип яза kukmor-rt.ru сайты.
Шушы көннәрдә Казанда "Хезмәткә һәм оборонага әзер" (ГТО) Бөтенроссия физкультура-спорт комплексы фестиваленең гаилә командалары арасындагы II этабы үтте.
Бу бәйгедә Кукмарадан Ивановлар командасы: гаилә башлыгы Виталий, тормыш иптәше Эльвира, әниләре Людмила Ильинична, 4нче урта мәктәптә укучы кызлары Екатерина көч сынашты. Гомуми зачетта һәм эстафетада җиңү яулап, алар 1 урынга лаек булдылар.
- Безгә бик көчле командалар белән ярышырга туры килде. Кукмара данын яклап җиңүебез белән горурланабыз. Безне котлаучыларга рәхмәтебез зур. Алда торган зур бәйгедә дә бар көчебезне туплап тырышырбыз, - диде безгә Эльвира ханым.