Кукмарада Үзбәкстан гражданнары үз илләрендәге Конституциягә үзгәрешләр өчен тавыш бирде
Кукмара районында яшәүче Үзбәкстан гражданнары илләрендәге Конституцияне үзгәртү буенча референдумда вакытыннан алда тавыш бирүдә катнашты.
Үзбәкстанның Казандагы Генераль Консуллыгының беренче секретаре Азизбек Разаков сүзләренчә, вакытыннан алда тавыш бирү Татарстанда 19-26 апрель көннәрендә үткәрелә. Бу хакта «Хезмәт даны» сайтында хәбәр ителә.
«Татарстан буенча күчмә комиссияләр оештырылган, аларда вакытыннан алда тавыш бирүне үткәрелә, шулай итеп, гражданнарыбызга үзләренең конституцион хокукларыннан файдаланырга һәм Үзбәкстанның сәяси үсешенә өлеш кертергә мөмкинлек тудырыла. Халык тәкъдимнәре нигезендә яңартылган Конституция проектында маддәләр саны 128дән 155кә кадәр артырга тиеш, нормалар саны ике тапкыр диярлек артачак. Ягъни илнең төп законы текстының 65 проценты халык тәкъдимнәре нигезендә яңартылачак», - дип аңлатты Азизбек Разаков.
Ул әлеге үзгәрешләр тормышның барлык өлкәләренә һәм хакимият органнарына кагыла дип өстәде. Төп басым кешеләрнең иминлегенә һәм тормышларын яхшыртуга ясала, гражданнарга шәхси хокуклар, лаеклы хезмәт шартлары булдыру, бушлай медицина, мәгариф һәм башкалар гарантияләнә.
Район Мәдәният йортындагы сайлау участогында кырыкка якын граждан үз сайлау хокукыннан файдаланып тавыш бирде.