Кукмарада Укытучылар һәм остазлар елын ябу тантанасында педагогларны бүләкләделәр
Укытучылар һәм остазлар елын ябу тантанасы Кукмара районы Мәдәният йорты фойесында башланды, анда 26 пар педагог «Укытучы вальсы» биеде. Чарада уңышларга ирешкән укытучыларны бүләкләделәр. Бу хакта «Хезмәт даны» хәбәр итә.
Район мәгариф идарәсе җитәкчесе Илфат Әхмәдуллин билгеләп үткәнчә, елдан-ел укытучыларга зур игътибар бирелә.
«2023 елда район башлыгы Сергей Димитриев ярдәмендә «Район башлыгы гранты» булдырылды. Бүген дә 37 номинациядә 120 педагог грант иясе булды. Бу акчалата премия, минемчә, зур стимул. Ә гомумән алганда, безнең төп бурыч — балаларга сыйфатлы белем бирү һәм аларны дәүләт имтиханнарына әзерләү», — диде Илфат Әхмәдуллин.
«Укытучылар һәм остазлар елы тәмамланды, әмма безнең социаль тормышыбыз, формалашуыбыз һәм тәрбиябез өчен хезмәт куючыларның эше дәвам итә», диелгән хәбәрдә.
Фото: Эльвира Иванова/ «Хезмәт даны»