Кукмарада "Тоннель" операциясе барышында кагыйдә бозу очраклары ачыкланган
Ике сәгатьлек операция барышында 60тан артык машина тикшерелде.
(Кукмара, 1 февраль, "Татар-информ", "Хезмәт даны"). 30 гыйнвар көнне, 9.00 сәгатьтән 11.00 сәгатькә кадәр Ленин урамында юл йөрү кагыйдәләренең үтәлешен тикшерү максатында, "Тоннель" операциясе үткәрелде. Кагыйдә бозуның 19 очрагы ачыкланган. Бу хакта kukmor-rt.ru сайты яза.
Операция барышында 60тан артык автомобиль тикшерелгән.
Дәүләт автоинспекторлары тарафыннан исерткеч эчемлек кулланган машина йөртүче тоткарланды. Моннан тыш алты шофер дәүләт теркәү билгеләре чиста булмаган, ике кеше куркынычсызлык каешын эләктермәгән, бер җәяүле юлны тиешсез урыннан чыккан өчен административ җаваплылыкка тартылды. Башка кагыйдә бозуның тугыз очрагы теркәлгән.
Бер транспорт чарасы махсус стоянкага озатылды.
Район ЮХИДИ хезмәте хәбәр итүенчә, мондый тикшерүләр алга таба да дәвам итәчәк.