Кукмарада районкүләм өмә игълан ителде
Кукмарада районы Мәдәният йортында киңәйтелгән киңәшмәдә район башлыгы Сергей Димитриев бүген республиканың торак пунктларында санитар-экологик икеайлык башлануы турында хәбәр итте. Бу хакта «Хезмәт даны» сайтында Лилия Нургалиева яза.
«Әлеге айлык 31 майга кадәр дәвам итәчәк. 2 апрельдә районкүләм өмә игълан ителде. Шул уңайдан һәркемне актив катнашуы сорала. Барлык җитәкчеләр үзләренең эш урыннарында өмәләр оештырырга һәм ведомство карамагындагы территорияләрне тиешле хәлгә китерергә тиеш», — диде ул.
Санитар-экологик икеайлыкка әзерлекнең барышы турында Башкарма комитет җитәкчесенең беренче урынбасары Чулпан Хәнәфина таныштырды.
9 Майда илебез Бөек Ватан сугышында Җиңүнең 80 еллыгын бәйрәм итәчәк. Бу бәйрәм Россия халкы өчен бик зур әһәмияткә ия, бигрәк тә бүгенге көндә. Районда Җиңү көнен бәйрәм итүгә әзерлекнең барышы турында Башкарма комитет җитәкчесе урынбасары Айгөл Әхмәтшина сөйләде.
Утырышта район кешеләренә мактаулы бүләкләр, грамоталар тапшырылды.