Кукмарада өлкәннәр белән очрашуда актив ветераннарга бүләкләр тапшырылды
Районда өлкәннәр белән очрашу-бәйрәм узды.
(Кукмара, 1 октябрь, "Татар-информ", "Хезмәт даны"). Халыкара Өлкәннәр көне уңаеннан 1 октябрьдә Кукмара 4нче урта мәктәбендә районның актив ветераннарын бүләкләделәр. Очрашу авыл җирлекләренең һәм оешма-предприятиеләрнең башлангыч ветераннар советы рәисләре катнашында узды. Бу турыда район басмасы хәбәр итә.
Чарада Татарстан Дәүләт Советы депутаты Римма Ратникова, район башлыгы урынбасары Равия Каримуллина, район ветераннар оешмасы рәисе Валентин Иванов һәм башка җитәкчеләр катнашты. Алар кунакларны бәйрәм белән котлап, районда һәм республикада башкарылган эшләр белән таныштырдылар, өлкәннәрне борчыган проблемаларны хәл итү буенча күрелгән чаралар турында сөйләделәр.
"Без сезнең уңышларыгыз белән горурланабыз, сездән үрнәк алабыз, шундый актив гражданлык һәм тормыш позициягезгә сокланабыз", - диде Римма Ратникова.
Бәйрәм чәй табыны артында дәвам итте. Мәктәп укучылары куйган концерт та өлкәннәргә ошады.