Кукмарада «Итек фест» бәйрәменә төрле төбәкләрдән катнашучылар җыелачак
Фестиваль концертында Фирдүс Тямаев һәм башка эстрада йолдызларының чыгышы көтелә.
(Казан, 31 декабрь, «Татар-информ», Гөлүзә Ибраһимова). 5 гыйнвар көнне Кукмараның Комсомол мәйданында узачак «Итек фест» бәйрәмендә күрше республикалардан һәм Киров өлкәсеннән катнашучылар булачак. Бу хакта «Татар-информ» хәбәрчесенә район башкарма комитеты җитәкчесенең социаль мәсьәләләр буенча урынбасары Айгөл Әхмәтшина әйтте.
«Итек фестиваленә катнашучылар Татарстан районнарыннан килүчеләр белән генә чикләнми. Фестивальгә күрше республикалардан һәм Киров өлкәсеннән дә киләчәкләр», — дип сөйләде ул.
Айгөл Әхмәтшина сүзләренчә, фестиваль элек кәсепчеләр һәм ансамбльләр катнашында гына узган, ә хәзер аны төрле яшьтәгеләр өчен яраклаштырганнар. «Без 18-45 яшьлек катнашучыларны кабул итәбез. Фестивальдә итек белән бәйле кышкы уеннар, ярышлар, осталар ярминкәсе булачак», — ди ул.
Фестивальдә җиңүчеләрне акчалата бүләкләр һәм Итек басу комбинатыннан махсус призлар көтә. Концертта Фирдүс Тямаев һәм башка эстрада йолдызларының чыгышы көтелә.