Кукмарада физик мөмкинлекләре чикле кешеләр өчен Сабантуй оештырылды
Бәйрәмгә килүчеләр уеннарда катнашып, бүләкләр алды.
(Кукмара, 13 июль, "Татар-информ", "Хезмәт даны", Алсу Гатауллина). Кичә Кукмараның Атлас Булатов исемендәге паркында физик мөмкинлекләре чикле өлкән яшьтәгеләр, олылар һәм балалар өчен Сабантуй оештырылды. Бу турыда җирле басма хәбәр итә.
Концерт номерлары, кызыклы бәйгеләр, милли һәм спорт уеннары, бүләкләр, баллы тәм-томнар – болар бәйрәмне тагын да онытылмаслык итте
Бәйрәмдә катнашучыларны район башлыгы урынбасары Равия Каримуллина, Башкарма комитет җитәкчесенең социаль мәсьәләләр буенча урынбасары Рузалия Галиева, эчке эшләр бүлеге начальнигы Рамил Нургалиев, социаль яклау бүлеге җитәкчесе Светлана Җамалиева, “Тылсым” халыкка социаль хезмәт күрсәтү үзәге директоры Нурсия Мөбарәкова һәм башка кунаклар сәламләде.
Сабан туенда концерт номерлары, кызыклы бәйгеләр, милли һәм спорт уеннары, бүләкләр, татлы тәм-томнар булды.
Бәйрәмгә килүчеләрдән беркем дә читтә басып тормады, ә барлык уеннарда да актив катнашып, лаеклы бүләкләр алды.