Сәхифәләр
«Татар-информ» мәгълүмат агентлыгы баш редакторы
Ринат Билалов
420066, Татарстан Республикасы, Казан, Декабристлар ур., 2нче йорт.
«ТАТМЕДИА» акционерлык җәмгыяте
«Татар-информ» мәгълүмат агентлыгы татар редакциясе
Баш редактор
Рәмис Латыйпов
Баш редактор урынбасары
Ләйсән Хафизова
Кукмарада "Аллаһ ризалыгы өчен хезмәт итү" дигән темага конференция узды
Конференция эшендә Казаннан килгән кунаклар да катнашты.
(Кукмара, 17 май, "Татар-информ", "Хезмәт даны", Гөлҗофар Миннеханова). Кукмара районының Өркеш авылындагы "Нур" мәчетендә "Аллаһ ризалыгы өчен хезмәт итү" дигән темага конференция үтте. Әлеге мәчетне төзүдә якташларыбыз Фәния һәм Рәшит Җәләлиевләрнең башлап йөрүләре һәм бу изге эшкә үзләреннән зур өлеш кертүләре мәгълүм. Фәния ханым күп еллар инде бабасы нигезендә булдырган "Фәниябикә" мәдрәсәсен дә җитәкли. Конференцияне дә ул оештырган, дип хәбәр итә kukmor-rt.ruсайты.
Әлеге чарага район мөхтәсибе Рәдиф хәзрәт, бу вазыйфаны күп еллар башкарган Зиннур хәзрәт, Өркеш авылының яңа сайланган имамы Райнур хәзрәт килгән иде. Гадәттәгечә, конференция эше Коръән аятьләрен тыңлаудан башланды.
-Монда җыелуыбызның максаты – яшь буынны тәрбияләүдә әхлак-әдәп мәсьәләсен югары дәрәҗәгә җиткерү турында фикер алышу. Сез, хатын-кызлар, балаларны, оныкларны тәрбия кылучы, шуңа күрә төп өмет сездә, - дип мөрәҗәгать итте Рәдиф хәзрәт абыстайларга. - Әйтик, әбием мине кечкенәдән үк догалар өйрәтеп тәрбияләде. Без үскәндә авылның кеме генә ачуланмасын, кисәтү ясамасын, тыңлый-курка идек. Балаларны әнә шулай бөтен авыл халкы күз-колак булып тәрбияләргә кирәк. Бу мәсьәләдә абыстайларның бер-берсе белән килешеп эшләве дә мөһим.
Зиннур хәзрәтнең дә вәгазе тирән мәгънәле булды.
Конференция эшендә Казаннан килгән кунаклар – филология фәннәре кандидаты Резедә Сафиуллина-Әл Әнси һәм фәлсәфә фәннәре кандидаты Ләйлә Төхвәтуллина да катнашты. Резедә ханым "Татарларда илаһият гыйлеме" дигән темага чыгыш ясады, ә Ләйлә ханымның чыгышы "Исламда илаһ хәрәкәте. Татар дини хәрәкәте" дигән темага багышланган иде.
Райнур хәзрәтнең "Аллаһ ризалыгы өчен хезмәт итү" дигән чыгышы да зур игътибар белән тыңланды. Конференциягә "Ак калфак" оешмасы җитәкчесе Зөмәрә Җиһаншина да чакырулы иде.
Сөйләшү-аралашулар чәйле мул табын артында дәвам итте. Бу җыелышта катнашкан һәркемгә дини китаплар, календарьлар бүләк итеп бирелде, диелә район хәбәрендә.
Кызыклы яңалыкларны күзәтеп бару өчен Телеграм-каналга язылыгыз