Хәвеф-хәтәр 17 октябрь 2018 23:00

Кукмарада 72 яшьлек агайның акчасын урлаганнар

Әлеге факт буенча "Мошенниклык" маддәсе буенча җинаять эше ачылган.

Скопировать ссылку

(Кукмара, 17 октябрь, "Татар-информ", "Хезмәт даны"). Район эчке эшләр бүлегенә Кукмарада яшәүчедән гариза керә: 72 яшьлек агай интернет-мошенниклардан зыян күргән, дип яза kukmor-rt.ru сайты.

Полиция хезмәткәрләре ачыклаганча, әлеге ир сайтларның берсенә үзенең Казан шәһәрендәге бүлмәсен арендага бирү турында белдерү урнаштыра. Берникадәр вакыттан соң аның кәрәзле телефонына таныш булмаган ир шалтыратып, күрше төбәктә яшәүче булуын, үзе эшләгән компаниядәге бер хезмәткәргә арендага фатир эзләүләрен хәбәр итә. Аренда шартлары, бәясе турында килешенгәннән соң, бу адәм бүлмә хуҗасыннан банк картасы мәгълүматларын сорый һәм телефонга код күрсәтелгән хәбәр киләчәген, әлеге кодны, акча күчерү өчен, аңа әйтергә кирәклеген белдерә. Бүлмә хуҗасы ул кушканнарның барысын да эшли. Кодны алганнан соң, мошенник банк картасы хуҗасының шәхси кабинетында теркәлә һәм аның акчаларын үз телефон счетына күчерә.

Шулай итеп, кукмаралы үзенең 2700 сумыннан колак кага.

Әлеге факт буенча "Мошенниклык" маддәсе буенча җинаять эше ачылган. Хәзерге вакытта тикшерү эшләре бара.

#Кукмара #Хезмәт даны

Сәхифәләр

Кукмарада 72 яшьлек агайның акчасын урлаганнар