Кукмара районының туганнар каберлегендә Бөтенроссия акциясе узды
Туганнар каберлегеннән алынган туфракны Россия Кораллы көчләренең төп гыйбадәтханәсе территориясендә саклау өчен Мәскәү шәһәренә озатачаклар.
(Кукмара, 21 июнь, “Татар-информ”, "Хезмәт даны"). Кукмара районында хәтер һәм кайгы көненә багышланган "Горсть памяти" Бөтенроссия хәрби-патриотик акциясе узды. Ул Россия Федерациясе Оборона министрлыгы тарафыннан оештырылган. Бу турыда җирле басма сайтында хәбәр ителә.
Чарада шәһәрнең хәрби комиссары Равил Гафиев, администрация вәкилләре, ветераннар, "Яшь армиячеләр" хәрәкәте активистлары һәм башкалар катнашты.
Акция барышында район территориясендә урнашкан туганнар каберлегеннән бер уч туфрак алынды, ул Россия Кораллы көчләренең төп гыйбадәтханәсе территориясендә саклау өчен Мәскәү шәһәренә озатылачак. Әлеге гыйбадәтханә 2020 елда Бөек Җиңүнең 75 еллыгына ачылачак.
Акциядә катнашучылар һәлак булан Ватан сакчыларын бер минут тынлык белән искә алдылар һәм каберлеккә чәчәкләр салдылар.