Кукмара районында балалар "Татар кызы-2019" бәйгесендә көч сынашты
Зур Сәрдек балалар бакчасында төрле авыллардан килгән 12 кыз үз осталыкларын күрсәтте.
(Кукмара, 1 апрель, "Татар-информ", "Хезмәт даны"). Март аенда Зур Сәрдек "Әкият" балалар бакчасында "Татар кызы-2019" бәйгесе булды. Бу турыда kukmor-rt.ru сайтында хәбәр ителә.
Биредә Адай, Аш-Буҗи, Купка, Чишмәбаш, Зур Сәрдек һәм "Кояшкай" балалар бакчасында тәрбияләнүче 5 яшьтән алып 7 яшькә кадәрге 12 кыз бала үзләренең осталыкларын күрсәтте.
Иң беренче бәйге "Үзем турында үзем" дип аталды. Һәрбер катнашучы гаиләсе хакында, гаилә әгъзаларының шөгыльләре турында бәян итте. Икенче бәйге – "Әнием белән бергәләп". Кызлар әниләре ярдәме белән тәмле ризыклар пешереп алып килгәннәр иде. Өстәлгә 12 төрле тәм-том тезелеп куелды. Катнашучылар ризык пешерү серләрен ачтылар, оста итеп сөйләп тә бирделәр.
Иҗади бәйгедә алар төрле сәләтләрен күрсәттеләр: җырладылар, биеделәр, шигырь сөйләделәр. Зур Сәрдек кызы, 5 яшьлек Айсылу Фәттахова көянтә-чиләкләр белән биеп тә алды. Аннан табышмаклар әйтешеп, бераз ял иттеләр, "Түбәтәйле" уенын бик матур итеп тәкъдим иттеләр.
Иң ахыргы бәйге "Әбиемнең серле сандыгы" дигән иде. Һәр гаиләдә әби-бабалардан, туганнардан калган истәлекләр ядкәр итеп саклана. Кызлар халкыбызның күңел җәүһәрләре, җаны хакында сөйләүче чигүле түбәтәйләр, кулъяулык, ашъяулык, чулпы, беләзек, алкалар белән таныштырды. Ә әти-әниләре исә буыннан-буынга калып баручы шәл бәйләү, итек басу осталыкларын ачты.
Бәйге тәмамлангач, һәр катнашучыга Мактау кәгазе һәм истәлек бүләкләре тапшырылды, "Ак калфак" оешмасы тарафыннан бирелгән ике калфак үз җиңүчеләрен тапты.