Кукмара районы бер тәүлектә җитештерелгән сөтнең күләме буенча 300 тонна чиген узды
РФ Авыл хуҗалыгы министрлыгы мәгълүматларына караганда, Татарстан Россия Федерациясе субъектлары арасында сөт җитештерү һәм сату күләме буенча әйдәп бара.
(Казан, 30 гыйнвар, «Татар-информ»). Бүген Кукмара районы бер тәүлектә җитештерелгән сөтнең күләме буенча 300 тонна чиген узды. Бу хакта ТР Авыл хуҗалыгы һәм азык-төлек министрлыгының матбугат хезмәте хәбәр итә.
Кукмара районы хезмәтчәннәре, авыл хуҗалыгы җирләренең мәйданы кечкенә булуга да карамастан, тарихта тәүге тапкыр һәм Татарстан Республикасында беренчеләрдән булып бер тәүлектә җитештерелгән сөтнең тулаем күләме буенча 300 тонна чиген узып китте.
ТР Авыл хуҗалыгы һәм азык-төлек министрлыгының оператив мәгълүматларыннан күренгәнчә, республикада 30 гыйнварда авыл хуҗалыгы оешмаларында тәүлеклек тулай савым 3 605,2 тонна тәшкил иткән. Бу узган елның шул чоры белән чагыштырганда 199,5 тоннага (106 процентка) артыграк.
РФ Авыл хуҗалыгы министрлыгы мәгълүматларына караганда, Татарстан Россия Федерациясе субъектлары арасында сөт җитештерү һәм сату күләме буенча әйдәп бара.