Кукмара районында Советлар Союзы Герое Сабир Әхтәмов каберенә чәчәкләр салдылар
Бөек Җиңүнең 77 еллыгын каршы алу хөрмәтеннән Кукмара районы Манзарас авылында җирләнгән Советлар Союзы Герое Сабир Әхтәмов каберенә чәчәкләр салдылар.
Чарада Татарстан Республикасы буенча Эчке эшләр министрлыгының шәхси состав белән эшләү идарәсе башлыгы эчке хезмәт подполковнигы Илһам Сәхапов катнашты, ул мәктәп җитәкчелегенә, геройның якты истәлеген саклауда зур өлеш кертүен искәртеп, рәхмәт сүзләре җиткерде. Бу турыда «Хезмәт даны» сайтында хәбәр ителә.
Чәчәк салу тантанасында шулай ук Россия Эчке эшләр министрлыгының Кукмара районы буенча бүлеге җитәкчесе Рамил Нургалиев, Россия Эчке эшләр министрлыгының Кукмара районы буенча бүлек җитәкчеләре, Манзарас авылы Сабир Әхтәмов исемендәге урта гомуми белем бирү мәктәбенең укытучылары, яшь патриотлары катнашты.
