Кукмара районы җитәкчелеге: Итекләр безне бик күп җирләргә танытты
Комсомол мәйданында «Кукмара итекләре» бәйрәме узды.
Бүген «Итек фест» Кукмара итекләре фестивале булды. Кукмара районының Башкарма комитеты җитәкчесе Азат Гарифуллин Кукмара итекләренең төрле җирләрдә билгеле булуын әйтте.
«Итекләребез безне бик күп җирләргә танытты. Кая барсак та «Кукмара ииекләре» дип сөйлиләр. Районда гына түгел, Мәскәүдә, илебезнең башка төбәкләрендә дә итекләрне күрәбез. Итекчеләрне бәйрәм белән котлыйм!" - дип сөйләде ул бәйрәм ачылышында.
Ул бу бәйрәмнең 2015 елдан бирле үткәрелүен әйтте.
Фото: © Гөлүзә Ибраһимова
Татарстан мәдәният министры урынбасары Ленар Хәкимҗанов районның төрле яклап алдынгы булуын ассызыклады.
"Кукмара районы тиз үсә, икътисады көчле. Кукмара итекләре данлыклы. Киез итек безнең милли аяк киеме инде. Монда аларны өй түренә куярлык итеп матур ясыйлар", - ди ул.
Комсомол мәйданында күргәзмә осталык дәресләре, ярышлар, ярминкә оештырылган иде. Егетләр «Итекле футбол» уенында көч сынашты. Саба районыннан килгән команда җиңүче булды.
Бәйрәмне Руслан Гыйльметдинов алып барды. Махсус кунак буларак Зөлфирә һәм Алмаз Мирзаяновлар килгән иде.
Фото: © Салават Камалетдинов
