Кукмара районы башлыгы тәрбиягә бала алган аналарны Әниләр көне белән котлады
Кукмара хакимиятендә район башлыгы Сергей Димитриев Әниләр көне алдыннан ятим һәм ата-ана тәрбиясеннән мәхрүм калган балалар тәрбияләүне, аларның сәламәтлеге, тормышы өчен җаваплылыкны үз өстенә алган опекун әниләр белән очрашты. Бу хакта «Хезмәт даны» хәбәр итә.
«Кызганычка, төрле сәбәпләр нәтиҗәсендә ятим яки ата-ана тәрбиясеннән мәхрүм калган балалар бар. Шунысы куанычлы: аларга үз мәхәббәтен, йөрәк җылысын бирергә әзер кешеләр табыла. Бу сез — опекун әниләр, герой әниләр! Баланы үз гаиләгезгә кабул итү һәрберегездән зур җаваплылык сорый. Сез андый балаларга гаилә учагының җылысын бүләк итәсез», — диде Сергей Димитриев, әниләргә мөрәҗәгать итеп.
Район Башкарма комитетының опека һәм попечительлек бүлеге җитәкчесе Нурзидә Гаптелганиева билгеләп үткәнчә, бүгенге көндә аларда 107 бала исәптә тора.
Фото: Эльвира Иванова, http://kukmor-rt.ru/