Кукмара районы башлыгы махсус хәрби операция зонасына гуманитар ярдәм илтте
Татарстан Кукмара районыннан махсус хәрби операция зонасына гуманитар ярдәмнең чираттагы партиясен илттеләр. Йөкне муниципалитет башлыгы Сергей Димитриев, шулай ук ТР Рәисенең Территорияләр белән эшләү идарәсе җитәкчесе урынбасары Илдар Ибраһимов, район хәрби комиссары Альберт Гомәров һәм Кукмара «Хәрби туганлык» вәкилләре озата йөрде.
Ярдәм нигездә хәрбиләрнең үзләре биргән исемлек буенча җыела. Йөккә янгын сүндергечләр, пистолет белән монтажлау күбекләре, ОСБ-плитәләр, саморезлар, балталар, ломнар, көрәкләр, фольгаланган термоодеяллар, чиләкләр һәм целлофан рулоннары кергән. Шулай ук Кукмарадан казан, тегү машинасы, матраслар, юрган-пледлар, гигиена чаралары һәм азык-төлек продуктлары җибәргәннәр.
Гуманитар йөкләрне җыюда, гадәттә, район предприятиеләре, мәгариф учреждениеләре, авыл җирлекләре, коллектив хуҗалыклар һәм эшмәкәрләр катнаша. Бу юлы волонтерлар һәм башка төбәкләр халкы кушылган.
«Бу ярдәм - гомуми хезмәт нәтиҗәсе. Без йөкне җибәреп кенә калмадык, ә алгы сызыкка кирәкле барлык әйберләрне җыйдык. Шулай ук хәрбиләргә Mavic пилотсыз очкычларын сатып алдылар һәм китерделәр. Безнең бурыч бүген алгы сызыкта булган егетләр алдында – аларга изге эшләрендә ярдәм итү, аларга хәрби бурычларын үтәүне җиңеләйтү, аларның хәрби рухын ныгыту», – диде Сергей Димитриев.
Кукмара «Хәрби туганлык» җитәкчесе Радик Габдрахманов сүзләренчә, бу инде гуманитар ярдәм белән 60нчы йөк машинасы. Операция вакытында барлыгы 500-600 тонна йөк, 32 автомобиль (12 автобусны да кертеп) һәм 7 мотоцикл җибәрелгән.
Материал Эльвира Иванова катнашында әзерләнде
Фото һәм видеоны «Хәрби туганлык. Кукмара» хәрби хәрәкәтләр ветераннары иҗтимагый хәрәкәте тәкъдим иткән.