Кукмара мәдрәсәсендә хатын-кызлар арасында хәләл эшмәкәрлекне үстерү буенча семинар узды
Бу чарада Рәсәй һәм Татарстан мөслимәләр берлеге рәисе Наилә Җиһаншина да катнашты.
(Кукмара, 26 март, "Татар-информ", "Хезмәт даны"). Кукмара мәдрәсәсендә "Мөслимә хатын-кызлар арасында хәләл эшмәкәрлекне үстерү" дигән темага семинар үтте. Бу турыда kukmor-rt.ru сайтында хәбәр ителә.
Бу чарада Россия һәм Татарстан мөслимәләр берлеге рәисе Наилә Җиһаншина да катнашты.
Биредә кул эшләреннән күргәзмә оештырылган иде. Моннан тыш мастер-класслар үткәрелде, катнашучыларның чыгышлары тыңланды.
- Семинар бер сулышта үтте. Мондый чаралар кызыклы гына түгел, кирәкле дә. Мин үзем Вахит авылыннан. Без гаиләдә алты кыз үстек. Әниебез кул эшләре остасы иде. Мамык шәлләр бәйләргә икенче сыйныфта укыганда ук өйрәндем. Заманында бу һөнәребез тормышта ярдәм итте, туендырды. Кайчак ике атнага өч шәл бәйли идек, аларны сатарга Нократ Аланы шәһәре базарына йөрдем, - дип сөйләде мәдрәсәдә гыйлем алучы Ризидә ханым Хәбибуллина.