Кукмара көрәшчеләре 46 команда арасында беренче урын яулады
Анда 400гә якын спортчы катнашты.
(Кукмара, 16 май, "Татар-информ", "Хезмәт даны"). Актанышта Татарстан Республикасының беренче Президенты кубогына 2003-2005 елгы яшүсмерләр арасында көрәш буенча ярышлар узды. Анда Кукмара спортчылары беренче урынны алды. Бу турыда kukmor-rt.ru сайтында хәбәр ителә.
Ярышларда бөтен республикадан 46 команда – 400гә якын спортчы катнашты.
Кукмаралылар, 422 очко җыеп, иң көчле көндәшләре – Әлмәт һәм Казан командаларын артта калдырып, беренче урынга чыкты. Ярыш нәтиҗәләре буенча үз үлчәү авырлыгында Инсаф Кәримуллин, Алексей Даниловлар чемпион калдылар. Богдан Григорьев, Артем Григорьев, Инсаф Гыйльметдиновлар – икенче, Рүзәл Тимергалиев, Илшат Гыйниятуллин, Илсаф Фәхретдиновлар мактаулы өченче урынны яулады.