Кучкай Пожары авылында «Сабантуй-2024» Сергач округы милли бәйрәме узды
Түбән Новгород өлкәсе Татар милли-мәдәни автономиясе советы әгъзалары татар җырчысы Хәйдәр Бигичевның 75 еллыгына багышланган «Сабантуй-2024» Сергач округы милли бәйрәмендә катнашкан. Масштаблы «Сабантуй» бәйрәме Кучкай Пожары (Кочко-Пожарки) авылында Пьяна елгасы яры буенда узган. Бу хакта Бөтендөнья татар конгрессы хәбәр итә.
Түбән Новгород өлкәсе татарлары автономиясе исеменнән башкарма директор Тимур Шәрәфетдинов катнашучыларны Сабантуй бәйрәме белән котлаган, бәйрәмне оештырган Сергач муниципаль округы башлыгы Олег Радаевка Сабантуйны әзерләве һәм уздырганы өчен рәхмәт белдергән. Ул шулай ук кунакларның барысын 27 июльдә узачак Түбән Новгород Сабан туена чакырган.
«Мондый чаралар Сергач округы территориясендә яшәүче халыкларның мәдәни мирасын саклап калырга һәм үстерергә, алар арасында дуслык һәм татулыкны ныгытырга ярдәм итә», - дип билгеләп үткән Шәрәфетдинов үзенең чыгышында.
Шулай ук Түбән Новгород өлкәсе татарларының төбәк милли-мәдәни автономиясенең башкарма директоры Сергач округы җитәкчелеге һәм җәмәгатьчеләренә татар мәдәнияте һәм рухи традицияләрен үстерүгә керткән өлеше, Сергач Сабантуена күрсәткән ярдәме, Түбән Новгород өлкәсе татарларының төбәк милли-мәдәни автономиясенең чараларын үткәрүдә күрсәткән булышлыгы өчен рәхмәт хатлары һәм истәлекле бүләкләр тапшырган.