Кремль яр буенда «Җиңү кайтавазы» фестивале старт алды
Бүген Казан кремле яр буенда «Җиңү кайтавазы» фестивале кысаларында «Бөек Җиңү җырлары» дигән концерт программасы тәкъдим ителде. Тамаша барышында ватанпәрвәрлек хисләре белән сугарылган, ил-көн матурлыгын данлаган җырлар яңгырады.
«Без үзебезнең иң шәп җырларыбызны башкарабыз. Репертуарыбызда татар һәм рус телләрендәге җырлар бар. Ватаныбыз тыныч булсын! Бөек Ватан сугышындагы каһарманлыкларны онытырга хакыбыз юк», — диде ТР Ветераннар берлегенең «Хәтер» хоры җитәкчесе, Татарстанның атказанган мәдәният хезмәткәре Гүзәл Щербинина.
Фото: © «Татар-информ», Юлай Низаев
Әйтергә кирәк, ветераннар хоры күптән түгел үзенең 25 еллыгын билгеләгән. Бирегә җыр-моң сөйгән өлкәннәр тупланган.
Концерт барышында шулай ук яшь һәвәскәр җырчылар Бөек Ватан сугышы елларында популяр булган җырларны башкарды. Концерт «Җиңү көне» җыры белән йомгакланды.
Фото: © «Татар-информ», Юлай Низаев
«Җиңү кайтавазы» фестивале Бөек Җиңү бәйрәменә кадәр дәвам итәчәк. 9 май, 16.00 сәгатьтә башланачак бәйрәм концерты белән тәмамлануы көтелә.