Сәясәт 1 февраль 2023 15:16

Кремль Көнбатыш танкларын юк иткән өчен хәрбиләрне бүләкләү идеясен хуплады

Скопировать ссылку

Көнбатыш танкларын юк иткән өчен хәрбиләрне бүләкләү идеясе махсус хәрби операция максатларына ирешүгә ярдәм күрсәтүдә һәркемнең «берләшүе» хакында сөйли, дип белдерде Кремльнең рәсми вәкиле Дмитрий Песков.

Ул әлеге инициативаны хуплады һәм аның танкларны юк итүдә булышырга мөмкин икәнлеген искәртте, әмма аларның махсус хәрби операция зонасында әлегә булмавын әйтте. Бу хакта РИА Новости агентлыгы хәбәр итә.

«Без бизнес тарафыннан да шундый тәкъдимнәр ишетәбез. Яндырылган, юк ителгән, кулга төшерелгән техника өчен төрле суммалар китерелә. Бу кешеләрнең, үз мөмкинлекләренә карап, махсус хәрби операция барышына ярдәм итүдә, төп бурычларга ирешүдә берләшүенә дәлилдер, мөгаен. Әлеге танкларга килгәндә, мондый кызыксындыру чаралары да булгач, аларны яндырачаклар, әлбәттә. Энтузиастлар тагын да күбрәк булыр дип уйлыйм», - диде ул.

Шул ук вакытта, Песков махсус хәрби операция зонасында әлегә мондый техниканың булмавын искәртте, чөнки аларны китерү өчен әзерлек кирәк.

Танкларны юк иткән өчен хәрбиләрне бүләкләү идеясен элегрәк Донецк Халык Республикасы вазифаларын вакытлыча башкаручы Денис Пушилин да хуплаган иде.

Искәртеп узабыз, Киевка танкларны АКШ (31 Abrams) һәм Германия (14 Leopard 2) тапшырачак, шулай ук Британия (Challenger 2), Польша (14 Leopard 2, 60 Twardy) һ.б. илләр дә хәрби машиналар җибәрергә әзер булуын белдерде. Шул ук вакытта, танклар әле тиз арада килеп җитмәячәк. Ак йортта моның өчен «берничә ай» вакыт кирәклеген искәрттеләр.

Сәхифәләр

Кремль Көнбатыш танкларын юк иткән өчен хәрбиләрне бүләкләү идеясен хуплады