Кравцов көллиятләрдә әзерлекнең яңа юнәлешләре ачылуы турында хәбәр итте
Россия көллиятләрендә әзерлекнең яңа юнәлешләре барлыкка килде. Бу хакта БДИ-2026 төп чоры нәтиҗәләре буенча РФ мәгариф министры Сергей Кравцов хәбәр итте, дип яза «РИА Новости».
Аның сүзләренчә, урта һөнәри белем бирү системасына яңа һөнәрләр һәм белгечлекләр кертелгән. Аерым алганда, колледжлар төзелештә мәгълүмати модельләштерү һәм квант коммуникацияләре буенча белгечләр әзерли башлады.
Моннан тыш, абитуриентларга заманча технологик юнәлешләр дә тәкъдим ителә, алар арасында ясалма фәһем кулланып чишелешләрне интеграцияләү, сәнәгать дизайны һәм электроника өчен синтетик кристаллар җитештерү бар.
Кравцов шулай ук укучыларның бер өлеше хәзер беренче һөнәрне мәктәптә укыганда ук ала алачагын хәбәр итте. Ул аңлатканча, тиешле карар Дәүләт Думасында урта һөнәри белем бирү мәсьәләләре буенча Хөкүмәт сәгате барышында кабул ителгән.
Министр билгеләп үткәнчә, бүген тугызынчы сыйныфны тәмамлаучыларның 60 проценты көллиятләргә керүне сайлый. Ул искәрткәнчә, узган кабул итү кампаниясендә абитуриентлар дүрт миллионга якын гариза биргән иде, бу рекордлы күрсәткеч булып тора.