Җәмгыять 12 апрель 2017 07:42

Космонавтика көнендә социаль челтәрләрдә “Башыңны югары күтәр” флешмобы уздырылачак

Әлеге акция Халыкара космонавтика көне уңаеннан үткәрелә.

Скопировать ссылку

(Казан, 12 апрель, “Татар-информ”). Бүген, 12 апрельдә, Бөтендөнья космонавтика көне уңаеннан, социаль челтәрләрдә “Башыңны югары күтәр” флешмобы уздырылачак. Бу хакта “Башинформ” мәгълүмат агентлыгы хәбәр итә.

Акцияне уздыру уе Санкт-Петербургта “Дөреслек һәм гаделлек” (“Правда и справедливость”) Бөтенроссия халык фронты медиафорумында туа. Флешмобта барлык теләгән кешеләр катнаша ала, ди оештыручылар.

Социаль челтәр кулланучылары, башларын югары күтәреп күк йөзенә карап, үз-үзләрен фотога төшерергә (“селфи” ясарга) һәм #поднимиголову хештегын куеп, үз аккаунтларында әлеге фотоны чыгарырга тиеш. Фотоларны челтәргә чыгару Мәскәү вакыты белән 09.07 сәгатьтә башлана. Юрий Гагарин космоска менгән “Восток-1” космик корабле нәкъ шул сәгатьтә старт ала.

Моннан тыш, әлеге акция “Восход-2” корабленең космик бурычларын үтәве турындагы “Время первых” фильмының киң экраннарга чыгу хөрмәтенә дә багышлана.

Белешмә өчен. 12 апрельне Космонавтика көне буларак бәйрәм итү 1962 елның 9 апрелендә СССР Югары Советы Президиумы указы белән гамәлгә керә. 1968 елдан Космонавтика көне Халыкара бәйрәм буларак билгеләп үтелә башлый. 2011 елдан әлеге бәйрәмнең тагын бер исеме барлыкка килә. Ул – Халыкара Кешенең космоска очу көне дип атала.

Моннан 56 ел элек - 12 апрельдә Советлар Союзы гражданы өлкән лейтенант Юрий Гагарин “Восток” космик кораблендә дөньяда беренче тапкыр Җир планетасы орбитасы тирәли очыш ясый. Әлеге очыш 1 сәгать 48 минут дәвам итә.

#Космонавтика көне

Сәхифәләр

Космонавтика көнендә социаль челтәрләрдә “Башыңны югары күтәр” флешмобы уздырылачак