Фән һәм мәгариф 31 гыйнвар 2022 18:18

Коронавирус сәбәпле, Уфада мәктәпләрне дистанцион укуга күчерәләр

Башкортстан Мәгариф һәм фән министрлыгының соңгы мәгълүматлары буенча, төбәктә мәктәп яшендәге 3 329 бала коронавирус белән авырый.

Скопировать ссылку

(Казан, 31 гыйнвар, «Татар-информ»). Балалар арасында тын юлларында вируслы кискен инфекция, шул исәптән коронавирус инфекциясе белән авыручылар саны арту сәбәпле, Уфада 126 мәктәпнең 21е дистанцион укуга күчә.

«Башинформ» шәһәр мэриясенә сылтама белән хәбәр иткәнчә, 1-7 февральдә 1-11 сыйныф укучылары өчен онлайн-укулар башлана.

Оператив штаб әгъзалары сүзләренчә, көн саен эпидемиологик вазгыятьне күзәтү дәвам итә. Бу оешмаларда авыручылар арту күзәтелгән очракта, онлайн-уку тагын 7 көнгә озайтылачак.

Элек хәбәр ителгәнчә, балалар арасында авыручылар арту сәбәпле, бүгенге көннән алып Башкортстанда 25 мәктәп тулысынча карантинга җибәрелгән.

Башкортстан Мәгариф һәм фән министрлыгының соңгы мәгълүматлары буенча, төбәктә мәктәп яшендәге 3 329 бала коронавирус белән авырый. Бу барлык укучыларның 0,67 проценты була.

#коронавирус #Коронавирус буенча карантин

Сәхифәләр

Коронавирус сәбәпле, Уфада мәктәпләрне дистанцион укуга күчерәләр