Коронавирус белән авырган КФУ студенты бүген хастаханәдән чыгарылган
Ректор университет укытучылары арасында Covid-19 белән авыручылар булмавын әйтте.
Скопировать ссылку
(Казан, 30 апрель, «Татар-информ», Гөлнар Гарифуллина). Коронавирус белән авырган КФУ студенты бүген сәламәтләнеп, хастаханәдән чыгарылган. Бу хакта КФУ ректоры Илшат Гафуров туры эфир барышында әйтте.
«Авырган студент кыз чыгарылды. Анда антитәнчекләр барлыкка килү нәтиҗәсендә, ул бүген авырмаган кешеләргә караганда да үзен яхшырак хис итәдер әле», — диде ректор.
Илшат Гафуров аның Казан кызы булуын, әти-әнисе белән бергә яшәвен һәм аның авыруы аркасында тулай торакларда карантин кертү соравы тумаганын искәртте.
Ректор университет укытучылары арасында Covid-19 белән авыручылар булмавын әйтте.